قد يهمك : كورسات الانجليش

السلام عليكم ورحمة الله ..

بسم الله الرحمن الرحيم والصلاة والسلام على سيد الخلق اجمعين سيدنا محمد وعلى الصالحين والتابعين ومن سار على هديهم الى يوم الدين وبعد :

الكثير منا يتسائل عن كورسات اللغة الانجليزية خصوصا طلاب الجامعات وبعض الخريجين وهل هى مفيدة ام لا ؟ وهل الشهادات بالفعل معتمدة ولها

فائدة ام لا ؟

فى الحقيقة انا حابب ابدأ بشرح مفصل لكل حاجة لوحدها عشان نحقق اكبر استفادة من الموضوع ده.

اولا: يعنى ايه كورس انجليزى ؟

هو دورة بيلتحق بيها الطالب عشان يزود معلوماته فى الانجليزى ويقدر يفهم اللى بيسمعه وبعدين يقدر يتكلم فيما بعد ان شاء الله

ثانيا : هل هستفيد من الكورس ده وهقدر ابقى احسن فى الانجليزى ؟

من خلال تجربتى انا بقولك اه هتقدر تبقى احسن من الاول بكتير لو خد الموضوع جد واشتغلت على نفسك كتير

ثالثا : ايه هو نظام الكورس ؟

نظام الكورس بيختلف من مكان لمكان فى عدد المستويات ولكن فى الاغلب بيكون فيه 12 مستوى general 

وده بيحتوى على الجرامر بتاع الانجليزى كله وبعض الكلمات اللى هتفيدك فى الكلام وطبعا احنا عارفين ان جرامر الانجليزى قواعد سهلة مبتتغيرش

وبعد متخلص المستويات دى هيبقى فيه مستويات conversation

يعنى محادثة اللى هتقدر تساعدك كتييير ان تتكلم كويس وتفهم كويس اللى تسمعه

وطبعا كل كورسات الانجليزى بتتعامل مع الانجليزى الامريكى مش الانجليزى البريطانى

رابعا : هو انا لازم اخد كل المستويات الكتيرة دى ؟

لا طبعا مش لازم لانك ممكن تاخد الشهادة فى اى وقت تحبه بعد مستويات معينة بتاخدها وبتحددها ادارة الكورس

وكمان كل الكورسات بتقدم خدمة اختبار تحديد المستوى اللى من خلاله ممكن تبدأ من مستوى عالى

خامسا : انا بسمع ان القوات المسلحة وبيرلتز والمعهد الامريكى وغيره انهم حلوين وكمان غاليين وده بيأكد انهم حلوين ؟

السعر  مش بيحدد اذا كان حلو او وحش ولا حتى الاسم .. كل الحكاية انك بتروح الكورس وانت وحظك لو دخلت مع مدرس شاطر 

هتعلى معاه وتحسن من نفسك بسرعة انما لو وقعت مع واحد متواضع فربنا معاك بقى وده انت هتحسه فى المدرس لما تقيس مستواك من مستوى لمستوى

سادسا : حكاية ان تكون الشهادة معتمدة ؟

لو كنت طالب وهتقدم الشهادة فى السى فى او متخرج ومحتاجة للشغل فلازم تكون معتمدة عشان تساعدك انما لو انت بتتعلم انجليزى ليك فى حياتك فالشهادة ملهاش لزمة انك تاخدها اصلا

السؤال السابع والاخير : هل لما اخلص الكورس يبقى كده هتكلم انجليزى ؟

خلينا واقعيين انت هتحسن من نفسك بس لسه هيكون قدامك الطريق بعد كده لوحدك انك تجتهد بالبحث عن مقاطع فيديو على الانترنت عشان تزود معلوماتك وتحسن نفسك اكتر

.. انا حاولت على قد مقدر اتناقش فى بعض الحاجات عن الكورسات واكيد انا نسيت حاجات اقولها فاللى عنده سؤال ممكن يسال وانا هجاوبه ..

ودول مواقع تقدر من خلالهم تقوى نفسك فى الانجليش

Speechyard.com

Ororo.tv

engvideo.com

.. والسلام عليكم ورحمة الله وبركاته ..